Íþróttir

 

Hið árlega knattspyrnumót utanhúss fór fram föstudaginn 3. október 2003 í blíðskaparveðri.  Til leiks mættu 5 lið, hvert öðru fagurlimaðra. Þó skal viðurkennt að bleiku bolanna frá síðasta ári var sárt saknað en vonandi lætur Vala Valtýs ekki sitt eftir liggja og mætir til leiks að ári með sitt frábæra lið.

Að venju öttu kappi allir við alla og í lokin stóð lið Reynslu og léttleika uppi sem sigurvegari. Það var öðrum liðum fremra og sigraði alla sína fjóra leiki, skoraði 24 mörk en hirti knöttinn 4 sinnum úr möskvum sínum.

Lið Grínarafélagsins án Markarinnar hreppti annað sætið, sigraði tvo leiki og tapaði hinum tveimur.  Ljóst er að liðið saknaði Gunnars Jónssonar markvarðar sárlega og því fór sem fór. Hann var staddur erlendis og ekki náðist að fljúga með hann heim fyrir mótið. 

Lið LA-LAW og LOGOS innbyrtu bæði einn sigur og eitt jafntefli, en lutu tvisvar í gras.  Markatala LOGOS var betri og hrepptu þeir því þriðja sætið.  Kom því  fjórða sætið í hlut LA-LAW. 

Restina rak lið Fulltingis sem ekki stóð undir nafni í þetta sinn, liðið gerði tvö jafntefli og laut tvisvar í gervigras. Ljóst er að piltarnir þafnast meiri og betri þjálfunar en vonandi verður búið að bæta úr því fyrir næsta mót. 

Sigurvegarar hampa bikar með gull á bringu