Laganefnd

Laganefnd Lögmannafélags Íslands hefur fjallað um ofangreint frumvarp og lætur í té eftirfarandi umsögn:

Í frumvarpinu er gert ráð fyrir lögfestingu viðbótarákvæðis við 91. gr. hlutafélagalaga, sem það ákvæði er nú svohljóðandi:

Þegar hluthafi krefst þess og slíkt má verða án tjóns fyrir félagið að mati félagsstjórnar skulu félagsstjórn og framkvæmdastjóri leggja fram á hluthafafundi upplýsingar um þau málefni, sem skipta máli um mat á ársreikningi félagsins og stöðu þess að öðru leyti eða áhrif geta haft á afstöðu hluthafa til mála, er ákvörðun á að taka um á fundinum. Upplýsingaskyldan á einnig við um samband félagsins við félög innan sömu samstæðu.

Ef upplýsingar eru ekki tiltækar á hluthafafundi skulu hluthafar innan fjórtán daga þar frá eiga aðgang að skriflegum upplýsingum hjá félaginu og einnig skulu þær sendar þeim hluthöfum er þess hafa óskað.

Með hinni nýju grein er mælt fyrir um víðtækari skyldu til að veita Alþingi upplýsingar um málefni hlutafélaga en annars er gert ráð fyrir, og er ákvæðinu ætlað að ná eingöngu til félaga sem eru í eigu ríkisins að hálfu eða meira.

Laganefnd LMFÍ telur efni frumvarpsins óheppilegt, enda getur upplýsingagjöf í skjóli slíkrar reglu orðið til að skaða hagsmuni félags og þar með annarra hluthafa en ríkisins.
Á það skal minnt í þessu sambandi, að sérstakar reglur gilda um endurskoðun fyrirtækja, þ. m. t. hlutafélög, sem eru í eigu ríkisins eða hálfu eða meira.  Samkvæmt 2. mgr. 6. gr. laga nr. 86/1997 um Ríkisendurskoðun skal sú stofnun annast eða hafa yfirumsjón með endurskoðun reikninga slíkra félaga. 

Laganefnd tekur út af fyrir sig ekki afstöðu til þess, hvort æskilegt geti verið að mæla fyrir um ríkari rétt Alþingis til upplýsinga um málefni félaga sem alfarið eru í eigu ríkisins.  Hitt er ljóst að hagsmunir annarra hluthafa en ríkisins hljóta að krefjast þess að sömu reglur gildi um öll málefni félaga sem aðrir eiga hlut í en ríkið, hvort sem ríkið er eigandi meirihluta hlutafjár eða ekki.