Laganefnd

Laganefnd félagsins hefur fjallað um ofangreint frumvarp og lætur í té eftirfarandi umsögn:

Í 5. gr. frumvarpsins er gert ráð fyrir allmörgum breytingum á 14. gr. laganna, og sýnast þær flestar rökréttar. Með lögfestingu 4. töluliðs greinarinnar er þó að mati laganefndar farið inn á vafasamar brautir, en þar er gert ráð fyrir að innheimta sérstakt gjald af starfsmönnum á Keflavíkurflugvelli fyrir aðgangsskírteini að vinnusvæðinu. Þetta mun vera nýmæli, en ekki er vitað til að starfsmenn þurfi að greiða ríkissjóði gjald fyrir aðgang að vinnustöðum sínum, hvort sem um er að ræða opinbera starfsmenn eða aðra. Ekki verður ráðið af frumvarpinu að ætlunin sé sú að vinnuveitendur standi undir þessum kostnaði vegna starfsmanna sinna.

Laganefnd leggur eindregið til að 4. töluliður verði felldur út úr frumvarpinu. Að öðru leyti sér nefndin ekki ástæðu til að leggjast gegn lögfestingu frumvarpsins.