Laganefnd

Laganefnd félagsins hefur fjallað um ofangreint frumvarp og lætur í té eftirfarandi umsögn:

Laganefnd telur eðlileg og sjálfsögð þau ákvæði frumvarpsins sem gera ráð fyrir andmælarétti fasteignareiganda við endurmat á fasteign hans skv. 31. gr. laga nr. 6/2001. Laganefnd gerir ekki athugasemdir við að í gildandi lög verði bætt heimild til endurmats að frumkvæði Fasteignamats ríkisins, í því skyni að tryggja samræmi, og vísast til hliðstæðra ákvæða í lögum um brunatryggingu nr. 48/1994. Hins vegar sýnist fyrirhuguð 3. mgr. 31. gr. laganna verða óþarflega óljóst orðuð um skyldu til að veita fasteignareiganda andmælarétt, þegar frumkvæðið að því kemur frá Fasteignamatinu sjálfu. Er lagt til að málsgreinin verði skýrar orðuð að þessu leyti. Að öðru leyti gerir laganefnd ekki athugasemdir við frumvarpið.