Laganefnd

Laganefnd Lögmannafélags Íslands (LMFÍ) hefur tekið ofangreint frumvarp til umsagnar.

Frumvarpið gerir ráð fyrir því, að við 27. gr. laganna bætist ný málsgrein, sem feli Ríkissaksóknara að gera skýrslu árlega um starfsemi ákæruvaldsins og þau mál, sem ákæruvaldinu bárust á skýrsluárinu. Gerir frumvarpið ráð fyrir því, að mál skuli flokkuð eftir tegundum brota og afgreiðslu og einnig að þar sem mál hafa verið felld niður eða fallið hefur verið frá saksókn, eða ákæru frestað tímabundið, skuli gerð sérstök grein atvikum og röksemdum ákæruvalds fyrir afgreiðslu.

Víða í öðrum löndum er nokkur eða mikil útgáfustarfsemi á vegum embætta, sem líkja má við Ríkissaksóknara, en laganefnd er ekki kunnugt um sérstakar ársskýrslur á Norðurlöndum nema í Danmörku og Finnlandi. Í Svíþjóð gefur embættið út sérstakt fréttablað. Tekið er undir með flutningsmönnum, að æskilegt sé að gefa út slíka ársskýrslu. Laganefnd telur þó hæpið að leggja fyrir Ríkissaksóknara hvert efni og efnistök í smærri atriðum skuli vera.

Laganefnd vill og vekja athygli á því, að vinna við og útgáfa slíkrar skýrslu mun krefjast mannafla og fjár, sem Ríkissaksóknari hefur nú ekki yfir að ráða.

Í samræmi við það sem að ofan greinir, mælir laganefnd með samþykkt frumvarpsins með þeim breytingum, að brott verði felld sérstök, nákvæm, fyrirmæli um innihald skýrslunnar.