Ábyrgðartryggingar – 2. október 2025
Á námskeiðinu verður fjallað ítarlega um ábyrgðartryggingar, sem er sú tegund vátrygginga, sem hvað mesta þýðingu hefur í starfi flestra lögmanna. Fyrst verður fjallað með almennum hætti um ábyrgðartryggingar, uppruna þeirra, eðli og tilgang. Rakið verður efni laga nr. 30/2004 um vátryggingarsamninga að því leyti sem það snertir ábyrgðartryggingar og sérstaklega fjallað um reglu 44. gr. laganna um beina kröfu tjónþola gegn vátryggingarfélagi og hvað í henni felst.
Fjallað verður um gildissvið ábyrgðartrygginga eins og því er lýst í skilmálum vátryggingafélaga, einkum hvaða tjón séu undanþegin ábyrgð. Þá verður fjallað um einstakar tegundir ábyrgðartrygginga, sem eru fjölmargar, og byrjað á lögmæltum ökutækjatryggingum, þ.e. ábyrgðartryggingu samkvæmt lögum um ökutækjatryggingar, en svo að starfsábyrgðartryggingum. Fjallað verður um eðli starfsábyrgðartrygginga, einkum gildissvið þeirra og hvers konar tjóni er vátryggt gegn, þ.e. annað hvort almennu fjártjóni eða annars konar tjóni. Þá verður sérstaklega gerð grein fyrir ýmsum starfsábyrgðartryggingum sem sérstaka þýðingu hafa t.d. starfsábyrgðartryggingar lögmanna, byggingarstjóra og fleira.
Loks verður fjallað um tengsl ábyrgðartrygginga og skaðabótaréttar, eins og þessi tengsl birtast í II. kafla skaðabótalaga nr. 50/1993. Þessi tengsl valda því að við ákveðin skilyrði getur skaðabótaábyrgð fallið niður.
Sérstakt námskeið um stjórnendaábyrgðartryggingar verður haldið 16. október n.k. og fá þau sem skrá sig á bæði námskeið afslátt.
- Kennari Viðar Már Matthíasson fyrrverandi hæstaréttardómari
- Staður Kennslustaður auglýstur síðar.
- Tími Alls 5 klst. Fimmtudaginn 2. október kl. 9.00-14.00.
- Verð Kr. 42.800,- fyrir félaga í félagsdeild LMFÍ, kr. 52.800,- fyrir félaga í LMFÍ og LÍ en kr. 66.000,- fyrir aðra.
Skráning hér